జ్ఞాపకాల అలలు

1) నే వెళుతున్నప్పుడు
నిండిన నీ కన్నులలోని
సన్నని నీటి పొర
నీ జ్ఞాపకం

2) నిశ్చలంగా ఉండే
నీ నిండు విగ్రహం
నా చిరు స్పర్శకి
చలించిన చలి వణుకు
నీ జ్ఞాపకం

3) చెప్పేది వినడం
నేర్చుకో ముందు
అంటూ చిరుకోపం తో
నాకేసి చూపిన తర్జని
నీ జ్ఞాపకం


4) జీవితం ఇంత
శాంతిగా కూడా ఉంటుందా
అనిపించే చక్కని
మనో కుటీరం
నీ జ్ఞాపకం


5)దూరంగా ఉన్నా
నీ ఎదలోని
అలమేలుని నేనేనన్న
కించిత్ గర్వం
నీ జ్ఞాపకం


6) విడి విడిగా ఉన్నా
అనుక్షణం తీరాన్ని
స్పృశిస్తూనే ఉన్న
సంద్రం లా
కలిసి ఉన్నంత సేపూ
నన్ను తాకుతూనే ఉన్న
ప్రియ స్పర్శ
నీ జ్ఞాపకం


7) ఎప్పుడొచ్చేది మళ్ళీ
అని అడుగుతోంది కృష్ణమ్మ
అంటూ వంతెన పైన
నవ్విన నీ నవ్వు
దిగులు నీ జ్ఞాపకం



 నిను తలవగానే
మనసులోని ఎందుకీ అలజడి ?
అని మొద్దబ్బాయిలా
ప్రశ్నించే అమాయకత్వం
నీ జ్ఞాపకం




9) నువ్వున్న కాసేపే
జీవించేది
మిగిలినదంతా
బ్రతకడమే అన్న
ప్రేమ వాక్యం
నీ జ్ఞాపకం



10) అలలుగా ఎగసిపడినా
కదిలి రాలేని
కడలివి నువ్వు
అన్న వెక్కిరింత
నీ జ్ఞాపకం



11) కలసి గడపలేని
కష్టాన్ని గానీ
కాలాన్ని గానీ నిందించలేని
నా అశక్తతకేసి చూసిన
జాలి చూపు
నీ జ్ఞాపకం



12) నా విరివి నీవంటూ
గుండెలకదుముకొని
నా కళ్ళను ముద్దాడిన
మురిపం
నీ జ్ఞాపకం



13) తోటలో పూలను చూస్తుంటే
చటుక్కున దరికి లాక్కుని
ముద్దు పెట్టిన చిలిపి
తుమ్మెద వైనం
నీ జ్ఞాపకం




14) ఆవేదనను ఆసాంతం
అంతరంగాన అదిమి
తప్పక కలుస్తాం మరల
అని ఆశగా పలికే
వరం లాంటి నమ్మిక
నీ జ్ఞాపకం


................... ........................ ప్రేమతో .... జగతి 6. 22 పి .ఎమ్ 11 జూలై 2013 గురువారం